بص على قدك بقلم الشاعر خيري صابر

بص على قدك كتبها خيرى صابر ياحبيبى بص على قدك ماتبصش فوق ولا انت يعنى عشان خدك لون البرقوق اسمر سماره وعلى عودك طارح رومان وعليك شفايف عنابى وانا نفسى ادوق ياحبيبى بص على قدك ماتبصش فوق

الناس عيونهم لون واحد وعينيك الوان وبحرهم فيه الواقع بس انا غرقان لا لاقى رمش ينجينى ولا امسك فيه واسمك رسمته على جبينى ماتحن ياذوق ياحبيبى بص على قدك ماتبصش فوق

ياللى قوامك على عودك ولا غصن البان رقة كلامك ووجودك عاملين اعلان وشعرك اللى بيسافر فى الهوى بيطير واللى اشتكت منه خدودك من نار الشوق ياحبيبى بص على قدك ماتبصش فوق

دانت فى حلاوتك وجمالك مالقيتش اتنين وربنا زاد وادالك ورد الخدين خطفنى قدك من نظره وبقيت محتار معقوله تطلع دى حلاوتك من طين مخلوق ياحبيبى بص على قدك ماتبصش فوق

ليلاتى تيجى ف احلامى واسهر وياك والاقى نفسى فى الجنه مع احلى ملاك والقانى راكب انا حصانى م الفرحه بطير وانت ماسك فى احضانى وانا اللى بسوق ياحبيبى بص على قدك ماتبصش فوق